Mo t’ap kapab tombe amouré. Mo fè sa tro bokou, wa tèlman rèv gremite ke mo vini nèrvè monte la ou mo pe glise.
Mé lê moun, se lib. Nenpòrt-ki gen anvi naje nu avèk kokodri, se chwa pèrsònel yé-kèn, aryen dot ke ekoute vwa anddan, tèl kòm fè mô vye konpè, Virg.
Sô donmbo Bea té mené Virg apre en joli prômnad, li té bayé li in bèl spèktak o lit, Apre li sere li proch prèsk tou lanwit, mè pa nwit antyé, seuleman sô kòr, pa sô am. Osito ke li té arive ouvri zyeu li ale chèrche avèk sô leman chaleu kôr li. (Petèt l’ap swete pike Bea en lot fwa.) Tou sa li té jwenn té bèl aryen, jus en pwegne dra frèt. Li té parti!
Virg té debite, andikape malad avèk tristès. Li chante san sès mo vante pou melodi chanson lamou pèrdi ke li tyen a koer, espesyalmon lê hit de HubCap Brown kòm Li pa a mô, mé li sé peu, e surtou Nenpòrt ki plas mo gade se twa ke mo wa. Li té pare kòm en disk grate. Bondyé! en jukebox tou antiyé.
Tou nouzòt né avèk koer kase. Nô koer kase mene nouzôt chanson. Moun ke pa kone chante lê paròl, bouganne yé dèryèr, mele yé tou, tèl kòm fè mô vye konpè, Virg.
Pa gen ni difikulte, ni mizèr. Chanson lamou pèrdi, se ti gout lapli. Nouzòt kone yé par koer, nouzòt ke tou té blije pèrdi moun sa-la nou ole, sa nou té tyen tro bref.
Rès la, se jus en pake bla-bla. Nouzôt kone, ye pa jame tournen bèk, kòm kone mô vye kompè, Virg.
Kòm kone mô vye compè, Virg. Premyé eskis, 27 awout 2026.